Ftuesit e konkursit për dramën shqipe "Katarina Josipi - 2013" do të
ndahen më 9 nëntor të këtij viti, në ditëlindjen e aktores kosovare
Katarina Josipi. Ky konkurs organizohet nga Teatri Kombëtar i Kosovës në nderim të aktores së shquar, Katarina Josipi (1923- 1969).
Këtë vit në garë për tri çmimet e para të këtij konkursi janë 44 tekste dramatike, të cilat do të vlerësohen nga një juri prej 5 vetash.
Konkursi i dramës shqipe “Katarina Josipi” është i hapur për të gjithë krijuesit shqiptarë që shkruajnë dramë.
Disa nga rregullat bazë janë:
dramat duhet të jenë jo më të shkurtra se 50 minuta;
do të merren në shqyrtim dramat e të gjitha zhanreve;
dramat e papërfunduara apo sinopsiset nuk do të merren fare në shqyrtim;
dramat duhet të jenë origjinale, të shkruara mbas vitit 2000, të mos jenë vënë në skenë ndonjëherë e të mos jenë botuar.
Tri dramat më të mira vlerësohen me tri çmime. Tri dramat fituese
botohen në një edicion special.