Në ambientet e Tirana Ekspres është çelur ekspozita personale e
piktorit Parid Dule. Parid Dule ka mbaruar Akademinë e Arteve të
Bukura në Tiranë në vitin 1994. Krijimtaria e tij fillon që në vitin
1979 me talentet e reja, vijon me një seri ekspozitash në zhanre
dhe teknika të ndryshme, brenda dhe jashtë vendit.
Këtë fillim viti, vjen për herë të parë në Tirana Ekspres me një
ekspozitë ndryshe duke ngacmuar artdashësit vetëm me nudot e tij.
Nimfat, subjekti kryesor, sublimohen nëpërmjet ngjyrave, motivit dhe brishtësisë së tyre. Ndjeshmëria e artistit perceptohet qartë nëpërmjet kësaj ekspozite e cila na tregon një aspekt tjetër të
natyrës femerore. Artisti nëpërmjet dritës na zbulon bukurinë dhe
fshehtësinë e karaktereve duke eksploruar brendësinë e tyre.