Kjo ekspozitë u hap më 26 dhjetor në Galerinë Kombëtare të Arteve dhe do të qëndrojë e hapur deri me datë 2 Shkurt 2014, në kuadrin e edicionit të 20 të Çmimit “Onufri”.
Çmimi “Onufri” është çmimi më i rëndësishëm publik për artet pamore në Shqipëri, organizuar nga Galeria Kombëtare e Arteve. Këtë vit ekspozita, që është përzgjedhja përfundimtare për
Edicionin e 20 të çmimit “Onufri”, i bën ‘Elozhe Dyshimit’.
Ekspozita mbledh së bashku veprat e 12 artistëve nga vende të ndryshme, dhe është përzgjedhja përfundimtare pas shqyrtimit të 130 aplikimeve që u bënë për këtë ekspozitë që nga njoftimi
për hapjen e saj në fillim të dhjetorit nga GKA.
“Elozhe Dyshimit”, propozuar nga kuratori italian Claudio Cravero për këtë edicion të ri të “Onufrit”, hulumton disa nga praktikat dhe temat e reja artistike që ndërmerren në ditët tona, duke treguar lidhjet e tyre me situatën e sotme politike, si një pasqyrë e dyshimit tonë të vazhdueshëm. Në veprat e përzgjedhura dyshimi shfaqet si diçka që pashmangshmërisht na prek të gjithëve. Në nivel social, sidomos në
dekadën e fundit, për brezin e ri, ata të lindurit mes viteve 1970 dhe fund viteve 1980 të cilëve u përkasin dhe 12 artistët e përzgjedhur, dyshimi është kthyer në një ndjenjë bazë, një instinkt vital që i tregon këtij brezi rrugën që duhet të ndjekë. E në këtë gjendje pezullie, ajo çka mbetet është gjendja këmbëngulëse e dyshimit,
që korrespondon me gjendjen e të “gjendurit në të tashmen”. Artistë si Driton Selmani, i lindur në Kosovë më 1987, Endri Dani, i lindur më 1987 dhe Irgin Sena, i lindur më 1982 në Shqipëri, janë “në mes të rrugës” mes një dëshire për të krijuar dhe ndërtuar për vendin e tyre, dhe një ndjenje zhgënjimi nga premtimet e shkuara për ndryshime sociale e kulturore. E megjithatë, në këtë epokë globale të hiper fleksibilitetit dhe hiper shpejtësisë artistë nga Shqipëria deri në Kosovë, por edhe nga Egjipti deri në Itali, po ndërmarrin qasje të reja për të përballur të tashmen e ditëve tona. Rëndësi të veçantë nuk ka dhe aq mediumi (teknika) e përdorur, sesa kërkimi i thellë për kuptim.