Komedia “10 vjet martesë” me autor Halil Vardar do vazhdojë në skenën e Teatrit Kombëtar më 17, 18 dhe 19 janar, ora 19:00.
Pjesa është përkthyer nga Ylljet Aliçka, regjisore është Inis Gjoni dhe
skenograf Arjan Mio. Interpretojnë: Genci Fuga dhe Eni Jani.
Ngjarja zhvillohet në ditët e sotme. Liza dhe Aleksi janë të martuar prej dhjetë vjetësh dhe kanë dy fëmijë. Ndërsa Liza në ditën e përvjetorit të martesës po mundohet të krijojë një atmosferë sa më
romantike duke u munduar të paraqitet përpara Aleksit sensuale dhe joshëse, po atë ditë Aleksi i rrëfen se e tradhton dhe se kërkon të divorcohet. Që në momentet e para të komedisë shpërthen në një ortek zënkash dhe pakënaqësish të dyja palëve, duke hedhur
të gjithë helmin e mbledhur në këto vite. Ata nisin të zbrazin të vërtetat e pathëna të bashkëjetesës, duke shprehur zhgënjimet e pësuara, tradhtitë, xhelozitë, pakënaqësitë e dëshirat e tyre në një përpjekje për të gjetur fajtorin. Ndaj autori në këtë moment kthehet në retrospektivë dhjetë viteve më parë, atje ku lindi dhe dashuria e tyre duke treguar një pamje të qartë të kësaj bashkëjetese.
Atmosfera tensionuese, konfliktuale dhe pasionale përçon gjithë komedinë. Në vorbullën e kësaj situate të pashpresë mosmarrëveshjesh ku gjithçka duket se ka përfunduar, autori në
fund na jep një zgjidhje befasuese duke na çuar shumë vite para ku
na paraqet këtë çift tashmë të moshuar që shihet se e kanë kaluar jetën bashkë. Me sa duket kompromisi është arma e fundit e një dashurie të mbaruar.
Për më tepër kontaktoni:
Tel.: +355 42 223 022