Teatri i Metropolit do të shfaqë në fundjavë, më 11, 12, 17 dhe 18 janar, ora 11:00, në sallën “Çehov”, dy shfaqje për fëmijë dhe pikërisht ato janë :
“Tak-tak... jam mama dhia!” dhe “Dhelpra dhe rrushtë”.
“Tak –tak ... jam mama dhia” është një shfaqje baleti me libret , regji dhe koreografi të Llaqi Nakos. Drejtor Artistik është Suela Konjari.
Interpreton grupi “Spektër” me skenografi dhe kostumografi të Ina Elezit. Solistë janë Avi Metohu, Xhovana Sejdia, Stelina Rakipi me muzikë të: Çajkovski, Shtraus, Minkus, Ponkiel.
“Tak-tak... jam mama dhia”bazohet mbi përrallën e njohur “Kecat dhe ujku”. Shfaqja vjen e përshtatur në balet nga koreografi i njohur Llaqi Nako, në të cilën janë bërë ndryshime për ta sjellë sa më reale në kohë po aq edhe argëtuese. Ngjarjet janë po të njëjtat, në një shtëpi në pyll, ku mama dhia, në këtë rast bri dhia, niset për në pyll të gjejë ushqim, ndërsa ujku vërtitet të kapë kecat. Pjesa për fëmijë “Dhelpra dhe rrushtë” e përshtatur nga regjisorja Armela Demaj
vjen për publikun e vogël, në një tjetër zhanër teatror, kabare show.
Dhelpra, personazhi kryesor i veprës luhet nga aktori Genti Deçka, një dhelpër jo e zakonshme, franceze me shije të hollë estetike, e cila për të arritur të kapë bistakun e rrushit përdor teknika nga më të ndryshmet. Pjesë të shfaqjes janë dhe kafshë të tjera të pyllit, si ariu, i cili luhet nga Rudi Kocibelli, urithi, që luhet nga Llukan Xhagjika apo miushja që interpretohet nga Brunilda Borova. Por edhe rrushi, nuk mbetet thjeshtë një symbol skenografik. Ai është një personazh më vete, që flet, ashtu sikurse dhe narratori shfaqjes.
Drejtor Artistik i shfaqjes është Suela Konjari, interpretojnë:
Genti Deçka, Brunilda Borova, Llukan Xhagjika dhe Rudi Koçibelli.