Festivali i Këngës në Radio Televizionin Shqiptar, ngjarja më e rëndësishme e muzikës së lehtë, vjen në edicionin e tij të 52-të, në datat 26, 27 dhe 28 dhjetor, ora 20:00, në sallën e Pallatit të
Kongreseve. Në këtë edicion të 52-të të festivalit, këngëtarët, kompozitorët dhe poetët do të prezantojnë për publikun 16 këngë në konkurrim si vlerë e shtuar në fondin e artë të muzikës së lehtë.
Këngëtarët pjesëmarrës janë : Hersi Matmuja, Besiana Mehmedi & Shkodran Tolaj, Luiz Ejlli, Frederik Ndoci, Orges Toçe, Klodian Kaçani, Lindi Islami & Venera Lumani, Blerina Braka, Xhejsi Jorgaqi, Xhejn & Enxhi Kumrija, Grupi LYNX, Marjeta Billo, Sajmir Braho, Rezarta Smaja,
Etmond Mancaku & Entela Zhula, Renis Gjoka. Tashmë shorti është hedhur në ambientet e Radio Tiranës dhe është përcaktuar dhe radha për të tri netët e Festivalit të Këngës. Tetë këngë do të konkurrojnë natën e parë dhe tetë në natën e dytë. Ndërsa finalen do e prekin të gjithë artistët konkurrues. Drejtor artistik i festivalit është Edmond Zhulali dhe regjisor është Petri Bozo.
Në edicionin e kaluar, fituese u shpall kënga “Identitet”, me muzikë të Bledar Sejkos, me tekst të Eda Sejkos dhe e interpretuar nga Adrian Lulgjuraj e Bledar Sejko. Për të 11-ën herë, kënga fituese do të
përfaqësoje Shqipërinë në Festivalin Evropian të Këngës që do të mbahet në Kopenhagen, në 6, 8 dhe 10 maj 2014.
Edicioni i parë i këtij festivali u mbajt në fund dhjetorin e vitit 1962 kur kënga e lehtë shqiptare nisi së pari rrugën e saj në Radio Tirana. I mbajtur në sallën e Institutit të Lartë të Arteve, Festivali i Parë kishte si udhëheqës artistik kompozitorin Abdulla Grimci dhe regjisor ishte Luigj Gurakuqi. Ndër vite, Festivali i Këngës u bë shtëpia e kompozitorëve të talentuar, instrumentistëve virtuozë dhe këngëtarëve me vokale ngjethëse. Do ta nisnin këtu karrierën e tyre për ta vijuar suksesshëm, legjendat e padiskutueshëm si Vaçe Zela, Avni Mula, Gaqo Çako, Ema Qazimi, Tonin Tërshana, Ferdinand Deda, Agim Krajka, Pjetër Gaci, Tish Daija, David Tukiçi, Llazar Siliqi, Fatos Arapi, Dionis Bubani, Zhuliana Jorganxhi, Xhevahir Spahiu, Alqi Boshnjaku, Kastriot Gjini, Alida Hisku, Irma Libohova, Mefarete Laze,
Anita Bitri, Manjola Nallbani, Aurela Gaçe e shumë emra të tjerë, të cilët renditen meritueshëm në panteonin e historisë së muzikës shqiptare.