Në sallën e Galerisë Kombëtare të Arteve është hapur ekspozita vetjake e akademikut kosovar, piktorit Rexhep Ferri.
Kuratore e ekspozitës është studiuesja e GKA, Suzana Varvarica Kuka. Në ekspozitë paraqiten 50 vepra në pikturë, në teknikën vaj mbi pëlhurë. Veprat janë një pjesë e krijimtarisë së tij 50 vjeçare. Vepra më e hershme është e vitit 1967, me titull “Porosia”.
Atmosfera e ekspozitës ndërtohet në idenë e titullit të saj: “Larg dhe Afër”, si një ndjesi e natyrshme dhe e gjeneruar nga hapësira e zhvillimit të arteve pamore në të dy vendet tona shqipfolëse, që në fillim të shek. XX.
Rexhep Ferri, u lind në Kukës, me 10 tetor 1937. Ferri ka përfunduar
shkollën e mesme të artit në Pejë në vitin 1958 dhe është diplomuar
në pikturë në Akademinë e Arteve në Beograd në vitin 1966. Në vitin 1974 u zgjodh pedagog i Akademisë se Arteve Figurative në Prishtinë dhe në vitin 2000 u zgjodh anëtar i Akademisë së Shkencave dhe të Arteve të Kosovës, ku punon aktualisht. Rexhep Ferri i përket artistëve që e formuan stilin e tyre, përmes studimit dhe kërkimit në disiplinat e modernizmit botëror. Ai kapërceu me shumë sukses kahet e forta e ndikuese të tyre dhe arriti të ketë gjuhën e tij pamore. Ajo spikat për imazhin e pastër figurativ, ku subjekti i nisur tretet si një mbresë e lënë dhe mediumi imagjinar merr pushtetin kryesor dhe dallon i pa ngatërrueshëm.
Ekspozita do të qëndroje e çelur deri më 15 dhjetor.