Teatri Kombëtar i Komedisë çeli sezonin e ri artistik me komedinë
“Zhurma jashtë skene”, vepër e dramaturgut dhe shkrimtarit anglez
Michael J. Frayn. Komedia që ka filluar të shfaqet që nga 1 nëntori e do të vazhdojë deri më 22 dhjetor, çdo të premte, të shtunë e të
diel, ora 19:00, në sallën e këtij teatri, është pritur me interes të veçantë nga publiku i kryeqytetit. Regjisor i shfaqjes është Kastriot Çipi, skenograf Genc Shkodrani dhe kostumografe Edlira Qyshka. Interpretojnë : Julia Ilirjani, Pjerin Vlashi, Niada Saliasi, Dorian
Ramaliu, Albana Sançolli, Mërkur Bozgo, Marsela Lena, Marsel Rupi.
“Zhurma jashtë skenës” është konceptuar si një teatër brenda teatrit. Kjo komedi është krijuar në vitin 1982 dhe e mori titullin pikërisht nga drejtimi i skenës teatrale duke treguar zhurmat që vijnë nga jashtë skenës. Ngjarjet janë vendosur në një “mulli të
shekullit XVI të restauruar për mrekulli”, të konvertuar në banesë moderne për të cilën nuk mungojnë kurrë qiramarrësit.
Autori i trilluar i kësaj farse quhet Robin Housemonger. Akti i parë përmban provën gjenerale, një natë para premierës, gjatë së cilës aktorët ende përpëliten me gabimet në hyrjes e daljes në skenë,
ngatërrimin e batutave dhe problemet teknike të dekorit e rekuizitave. Akti i dytë paraqet një shfaqje matine, një muaj me vonë. Këtë herë shfaqja shikohet nga prapa skenës, duke zbuluar
përkeqësimin e marrëdhënieve personale mes aktorëve, që kanë çuar në zënka jashtë skene dhe kaos në skenë.
Në aktin e tretë shohim një nga shfaqjet e fundit të turneut, ku mosmarrëveshjet mes aktorëve kanë arritur kulmin dhe gjithsecili
është lodhur dhe pret me padurim fundin e shfaqjeve.