Është e vetmja ndër tetë xhamitë e shek. XVIII-XIX të ndërtuara në Tiranë që e shohim ende sot. Themelet e saj i vuri në fund të shekullit XVIII Molla Beu, kurse faltoren e plotësoi biri i tij, Haxhi
Et’hem Beu, në çerekun e parë të shekullit XIX. Molla Beu arriti të ndërtonte xhaminë deri në përfundimin e kubesë, pa mundur të plotësonte minarenë dhe të përfundonte sofanë (portikun, hajatin),
suvatimet dhe dekoracionet sepse vdiq. I biri, Haxhi Et’hem Beu, e
plotësoi duke përfunduar xhaminë e çatinë, duke ndërtuar minarenë e sofanë dhe duke e zbukuruar me piktura e ornamente. Faltorja përfundoi së ndërtuari në vitin 1236 ‘h (1820-1821).