Pas një pune intensive të dy ideatorëve dhe realizuesve, Fatos
Lubonja dhe Ardian Isufi, dhe me iniciativën e Bashkisë së Tiranës u krijua memoriali-kujtesë e viteve të diktaturës “Post Bllok”. Një shenjë për të mos harruar atë çka shqiptarët kaluan për gati 5 dekada. Gjithçka është konceptuar në formën e një instalacioni, ku janë përfshirë simbole jo vetëm të diktaturës shqiptare, por edhe asaj botërore. Një strukturë betoni 3.6 metra e lartë, një nga 120 segmentet e Murit të Berlinit që ndau gjermanët për 28 vite, e cila u soll në Tiranë me iniciativën e Fondacionit Federal për Trajtimin e Diktaturës, një bunker që për vite ruajti hyrjen e ish-Bllokut dhe disa
shtylla nga galeritë e Spaçit, janë elementët që përbëjnë këtë memorial. Vendosur aty ku kryqëzohet Rruga “Ismail Qemali” me Bulevardin “Dëshmorët e Kombit” , memoriali “Post Bllok” duket
se ka një kuptim të dyfishtë. “Post Bllok”, sepse dikur aty kishte
ushtarë që nuk lejonin që ndokush të hynte në territorin “përtej”, atje ku jetonin familjet e pushtetarëve komunistë dhe “Post-Bllok”
apo “Pas-Bllokut”, si për të treguar atë çfarë ndodhi pas përmbysjes së “bllokut komunist”.