Edicioni i shtatë i javëve të kulturës gjermane “Tetori gjerman” në Shqipëri hapet në ditët e fundit të shtatorit.
Në programin e javëve të tetorit gjerman të organizuara nga Ambasada
e Republikës Federale të Gjermanisë në Tiranë, janë parashikuar aktivitete për të prezantuar larminë e kulturës së këtij vendi në Shqipëri. Ky program përmban një sërë aktivitetesh nga fusha e teatrit, artit figurativ, filmit, muzikës si dhe shkencës e politikës.
Aktivitetet që hapen në datën 27 shtator me një ekspozitë mbi Gjermaninë në Tiranë, do të shtrihen edhe në qytete të tjera të
Shqipërisë si Shkodra, Fieri, Elbasani, Pogradeci dhe Korça.
Në datën 4 tetor, në Qendrën e Gjermanishtes në Tiranë do të hapet panairi i informacionit i titulluar “Studime dhe hulumtime në Gjermani”.
Po këtë ditë në Teatrin Kombëtar të Komedisë në Tiranë do të hapet seria e aktiviteteve ndërkombëtare mbi letërsitë përreth Mesdheut.
Në datën 5 tetor, në sheshin përpara Bashkisë së Tiranës do të mbahet një koncert i gjatë rroku.
Deri në datën 19 nëntor në institucione të ndryshme kulturore artistike në Tiranë dhe në qytetet e lartpërmendura do të zhvillohen aktivitete të ndryshme artistike dhe kulturore, për të cilat ne do të japim informacion javë pas jave.