Ceremonia e ndarjes së Çmimeve “Kult” 2013 do të zhvillohet ditën e mërkurë, më 30 tetor, ora 20:00, në sallën e Teatrit të Operës dhe Baletit.
Ky është edicioni i nëntë i Çmimeve “Kult” dhe 30 tetori, do të mbledhë artistë të vjetër dhe të rinj në sallën e TKOB, në një natë Gala të mbushur me emocion dhe falënderime.
Këto çmime kanë treguar se promovojnë artistët që kanë sjellë vlera të padiskutueshme, duke u përballur edhe me sfidën që quhet
duartrokitje nga publiku. Pas tetë edicioneve të suksesshme, ku Akademia Kult ka nderuar më të mirët e vitit, fituesit e këtij çmimi mund të krenohen për rëndësinë e tij.
Ky edicion i nëntë do të sjellë në skenë këto kategori për ndarje të çmimeve:
Regjia më e mirë e vitit, Aktori më i mirë, Aktorja më e mirë e vitit për pjesën e Artit Skenik.
Ndërkohë përsa i përket artit muzikor kandidaturat për ndarjen e çmimeve janë:
Interpretuesi lirik i vitit, Instrumentisti dhe Albumi muzikor.
Për artin pamor, pritet të ndahet çmimi për Artistin Pamor të vitit.
Më tej janë edhe ndarjet e çmimeve për Librin Artistik të vitit dhe Përkthimin më të mirë. Ndryshe nga edicionet e tjera Kult Awards 2013, vjen me dy çmime speciale, e lidhur ngushtë me vitin jubilar
të 100 viteve Shtet Shqiptar. Bëhet fjalë për Botimin e Pavarësisë dhe Dokumentarin mbi Pavarësinë. Por nata Gala, nuk do të përfundojë vetëm me ndarjen e çmimeve për secilën kategori, të tjera surpriza dhe të veçanta do të na shoqërojnë përgjatë gjithë mbrëmjes. Artistë, konkurrentë, të ftuar specialë do të na dhurojnë më 30 tetor spektakël dhe kënaqësi.