Teatri i Metropolit shfaq këtë fund javë, në datat 26 dhe 27 tetor,
ora 11:00, në sallën “Shekspir” pjesën për fëmijë “Dhelpra dhe rrushtë” bazuar tek fabula e Ezopit. Fabula e njohur, e përshtatur nga regjisorja Armela Demaj vjen për publikun e vogël, në një tjetër zhanër teatror, kabare show. “Dhelpra dhë rrushtë” është një shfaqje për fëmijë, e sjellë nëpërmjet muzikës, (tip kabareje) ku pjesa më e madhe përshkruhet nga muzika dhe koreografia, gjë e cila e bën më argëtuese për fëmijët. Është stilizuar disi duke ndërthurur në fabul edhe personazhe të tjerë kafshësh. Na ishte njëherë… një dhelpër
… Një ditë pa disa bistakë rrushi majë hardhisë. Goja i shkoi lëng. Kërceu, e kërceu aq shumë, për ti arritur ata bistakë, sa kur nuk i kapi dot, tha: Oh, këto rrush janë të thartë e të pabërë! Ndodh shpesh në realitet të përbuzësh atë që nuk mund ta kesh, e mandej të thuash “oh, si dhelpra, që nuk kapi dot rrushin…”. Morali i kësaj
fabule të famshme të Ezopit ka pushtuar globin. Dhelpra, personazhi kryesor i veprës luhet nga aktori Genti Deçka, një dhelpër jo e zakonshme, franceze me shije të hollë estetike, e cila për të arritur të kapë bistakun e rrushit përdor teknika nga më të ndryshmet. Pjesë të shfaqjes janë dhe kafshë të tjera të pyllit, si ariu, i cili luhet
nga Rudi Kocibelli, urithi, që luhet nga Llukan Xhagjika apo miushja që interpretohet nga Brunilda Borova. Por edhe rrushi, nuk mbetet thjeshtë një symbol skenografik. Ai është një personazh më vete, që flet, ashtu sikurse dhe narratori shfaqjes. Drejtor Artistik i shfaqjes është Suela Konjari, interpretojnë: Genti Deçka, Brunilda Borova, Llukan Xhagjika dhe Rudi Koçibelli