Në datat 29, 30 tetor dhe 5 nëntor, në kuadër të Tetorit gjerman në
Shqipëri, do të organizohet tek Universiteti i Arteve një kurs interpretimi me Caroline Merz (Soprano) dhe Desar Sulejmani (piano). Ndërsa më 30 tetor, ora 19.00, do të jepet edhe një koncert tek Universiteti i Arteve në Tiranë. Romanca vokale gjermane, si një gjini shumë e rëndësishme në repertorin vokal në tërësi, ka qenë shumë pak e analizuar, e studiuar dhe e mbështetur artistikisht
në Shqipëri. Në kuadër të njohjes, studimit dhe përhapjes së romancës vokale gjermane në Shqipëri me rastin e aktiviteteve
artistike të Tetorit Gjerman do të organizohet për herë të dytë që nga viti 2011 në Universitetin e Arteve në Tiranë kursi i interpretimit vokal me artistët gjermanë, sopranon Caroline Merz dhe pianistin Desar Sulejmani. Përgjatë këtij kursi 7-ditor (29 tetor deri 5 nëntor 2013) nga drejtuesit e tij do të përzgjidhen deri në 15 studentë të
degës së kantos dhe pianos sëUniversitetit të Arteve në Tiranë, të cilët do të marrin pjesë aktive në këtë kurs interpretimi. Ky kurs falas është gjithashtu i hapur për të gjithë studentët e tjerë të interesuar nga Universiteti i Arteve në Tiranë sikurse është pa pagesë për to. Në bashkëpunim me katedrën e pianos dhe të kantos përgjatë këtij kursi synohet të krijohen të ashtuquajturat duo me studentë të pianos dhe të kantos. Rezultatet artistike të këtij kursi do t’i
paraqiten publikut shqiptar në formën e një koncerti përmbyllës me pjesëmarrësit e kursit më 5 nëntor 2013 në sallën e madhe të Universitetit të Arteve në Tiranë.