Me rastin e 80 vjetorit të mjeshtrit
Agron Aliaj(Artist i Popullit), Teatri i Operës dhe Baletit shfaq të dielën, më 27 tetor, ora 19:00, galanë e baletit “Agroniada”.
Kjo shfaqje përfshin krijimtarinë artistike të mjeshtrit dhe do të realizohet me interpretimin e solistëve e trupës së baletit si dhe orkestrës simfonike të TKOB.
Agron Aliaj lindi më 30 Tetor 1933 në Delvinë. Ai ishte ndër të parët
solistë të Filarmonisë Shqiptare(1948). Studimet e larta i kreu në shkollën koreografike pranë Teatrit Akademik të Moskës (1950-1956). U emërua solist i parë i trupës së baletit të Teatrit të Operës dhe Baletit ku realizoi me nivel të lartë artistik interpretativ disa
kryerole të literaturës të baletit kombëtar dhe atij botëror si:“Halili dhe Hajrija” (1963), “Delina” (1964”; “Cuca e maleve” (1970) ;
apo të baleteve klasike ; “ Kujdesi i kotë” (1957) ; “Romeo dhe Xhulieta” (1957) ; “Françeska da Rimini” (1962) ; “Lola” (1958); “Paganini” (1963); “Fadeta” ( 1960) etj. Aktiviteti i tij artistik u pasurua me veprën e tij krijuese koreografike. Pas realizimit të shumë valleve dhe numrave koncertorë ai është autor i i shumë baleteve kombëtare : “ Cuca e maleve” (1970) ; “ Tokë e pamposhtur” (1977); “Para stuhisë” (1982); “ Plaga e dhjetë e Gjergj Elez Alisë” (1966, 2012) ; “Halili dhe Hajrija” ( 1966 ) si dhe baletet
klasike “Zhizel”, “Don Kishoti” (1990), “Romeo dhe Zhulieta” (1996), “Hirushja” (2002), “Katedralja e Parisit” (2003), “Liqeni i Mjelmave”, etj. Agron Aliaj ka qenë pedagog në Akademinë e Dansit dhe
Akademinë e Artit në Tiranë. Ai është nderuar me “Çmimin e Republikës” dhe titullin e lartë “Artist i Popullit”.