Trioja Lafroyg “Ludwig van Tango“ do të japë koncert ditën e dielë, më 6 tetor, ora 19.00, tek Universiteti i Arteve Tiranë si dhe më 8 - 10 tetor, klasë maestrosh në Liceun Artistik “Jordan Misja“ Tiranë.
Ansambli i ri “Lafroyg“, i përbërë nga pianistja shqiptare Kledia Stefani,
violinçelisti francez Yan Vaigot dhe klarinetisti gjerman Robert Beck
sjell në sallën e koncerteve një erë të freskët, shoqëruar heraherës
nga një ashpërsi e këndshme. Kombinimi i jashtëzakonshëm i pianos, një instrumenti frymor dhe i një instrumenti harku i mundëson këtij ansambli me përbërje ndërkombëtare t’i lënë rrjedhë të lirë kënaqësisë së tyre të eksperimentimit dhe kurajos muzikore duke prodhuar kështu ngjyra të panumërta tingujsh.Me programin „Ludwig van Tango“ trioja Lafroyg prezanton të gjithë larminë e kompozimeve
për një përbërje të tillë. Përballë repertorit „klasik“ trioja vendos disa kompozime të „Tango Nuevo“, dhe sigurisht që këtu theksi i vihet Astor Piazzolla-s dhe ciklit të tij të Katër Stinëve, të cilin ai ia kushton qytetit prej nga vjen, Buenos Aires-it, qytetit ku ka lindur tangoja.