Teatri i Metropolit shfaq më 28 maj, te amfiteatri, pranë Liqenit Artificial të Tiranës, komedinë "14 vjeç dhëndër" .
Kjo shfaqje jepet për bamirësi për Mejsin, një dy vjeçare me tumor në kokë. Komedia "14 vjeç dhëndër" (bazuar mbi motivet e Çajupit) vjen me regji të Elma Doresit. Drejtor artistik është Suela Konjari.
Interpretojnë: Klodiana Keco, Klodian Hoxha, Devis Muka, Elona Hyseni, Lorenc Kaja, Ermela Ruri, Genti Deçka, Alban Musa, Doriana Caushi, Aldion Matarangasi, Klaus Laçi. Tana, një nga personazhet e komedisë, do të martojë të birin katërmbëdhjetëvjeçar me një vajzë më të madhe se ai: ajo "nuk do nuse për sisë, po për punët e shtëpisë". Kjo bëhet shkak për një varg situatash e skenash komike
dhe batutash plot humor që fshikullojnë mendësi të mykura, patriarkale e zakone të prapambetura. Komedia vjen në një këndvështrim regjisorial ndryshe, ku nuk mungojnë elementet si folk në kostumografi, në muzikë, e cila interpretohet live nga aktorët, apo këngë të bazuara në poezitë e Çajupit, të kënduara nga vetë protagonistët e shfaqjes. Gjithë shfaqja, e cila është një ripunim mbi motivet e Çajupit, mbahet në zhanrin e groteskut. Një nga trajtimet e personazheve është ndryshimi i gjinive jo tek aktorët, por në
interpretimin e personazheve, që do të thotë gratë sillen si burra dhe burrat si gra. Komedia, e cila ka korrur sukses për javë me radhë në skenën e Teatrit të Metropolit, është nderuar me çmimin “Shfaqja më e mire ” e Festivalit “Flaka e Janarit” në Gjilan, “Regjisorja e realitetit të ri teatror” për regjisoren Elma Doresi dhe “Aktori më
i mirë” për Devis Mukën, në rolin e Gjinos.