Në ambientet e Galerisë Kombëtare të Arteve është hapur ekspozita
“Territore të vogla lirie (1968-1973)” e piktorit Alush Shima.
Ekspozita është realizuar në bashkëpunim me dy kuratorët dhe
kritikët italianë të artit, profesorët Vanja Strukelj dhe Arturo Calzona, të cilët janë përqendruar në vitet e hershme të punës së piktorit, sepse këto vite janë të një rëndësie të dyfishtë. Së pari, në ato vite
kultura shqiptare kaloi nëpër një periudhë të shkurtër lirie për të
eksperimentuar dhe, së dyti janë vitet e formimit artistik të Shimës.
Janë ekspozuar punë ku ndihet influenca dhe dialogu i artistit me
pikturën moderniste perëndimore dhe me autorët kryesorë të saj.
Sipas kritikëve Strukelj e Calzona, Shima e ndërton identitetin e tij në përballje me mjeshtrit e mëdhenj të artit të së shkuarës dhe sidomos në një marrëdhënie të ngushtë me pikturën e Braque-ut dhe të Mattisse-it, vepra e të cilëve bëhet për piktorin shqiptar një terren për t’u eksploruar. I ekspozuar fare pak gjatë viteve të regjimit socialist, Shima punoi në fshehtësi duke e zhvilluar veprën e tij larg syve të të tjerëve. Veprat në këtë ekspozitë janë të
rëndësishme pasi vijnë për herë të parë para publikut duke treguar një mikrobotë të fshehur e shumë interesante që ka ekzistuar brenda botës së ngurtë kulturore të Shqipërisë socialiste.
Ekspozita do të qëndrojë e hapur deri më 27 maj.