Premiera e re e komedisë dramatike “Tri mendje në ankand” e autorit të njohur Ferdinand Hysi, do të shfaqet në datat 13, 14,
19, 20 dhe 21 prill, ora 19ºº, në Teatrin e Metropolit, salla “Shekspir”.
Shfaqja është me regji të Elma Doresit, drejtor Artistik është Suela Konjari, skenografia e Beqo Nanajt, kostumografia nga Edlira Qyshka.
Interpretojnë aktorët : Devis Muka, Alban Musa, Klodian Hoxha, Elona Hyseni, Dori Çaushaj dhe Lorenc Kaja.
Kjo vepër e shkruar në vitin 1994 është përzgjedhur ndërmjet 120 dramave më të mira të Evropës, duke i dhënë jo pak vlerësim komedisë dramatike që mban firmën e dramaturgut Ferdinand Hysi.
Kjo pjesë vjen nëpërmjet një simbolike të qartë dhe të mprehtë.
Tri personazhet, përfaqësojnë shtresa të ndryshme të shoqërisë. Njëri aktor, tjetri fizikant dhe i treti një historian. Të gjendur në psikiatri, ata duan të zënë pikat e spitalit dhe të rregullojnë psikiatrinë dhe këtë gjë e kanë shumë seriozisht. Shpeshherë në suazën e rolit, që kanë marrë përsipër, ata akuzojnë botën që i rrethon se është më e çmendur se vetë ata, që janë janë të shtruar në këtë spital. Ironia dhe sarkazma marrin formën e tyre më të plotë kur, në ndihmë të këtyre
të “çmendurve” vjen një përfaqësues i një shoqate humanitare , që ka si mision, të ndihmojë këtë psikiatri. Në këtë linjë është dhe personazhi i Popit, një personazh që nuk flet, është memec, por sinjifikon për tre personazhet, popullin. Me heshtjen dhe memecerinë e saj, e forcon edhe më shumë këtë çmenduri që jepet edhe nëpërmjet kësaj dhome psikiatrie, gjysmë të shkatërruar.
Ndaj dhe vepra ”Tri mendje në ankand” na percjell mesazhin e saj për dashuri. Kjo botë ka nevojë për shumë dashuri!