Kjo ekspozitë qëndron e hapur që prej datës 9 mars në “The Apartament”. Ekspozita konsiston në një konfigurim të historisë së artit duke filluar që nga fillesat e produksioneve primitive deri në
ditët e sotme. Kjo ekspozitë është vazhdimi i ekspozitës
“Atëherë dhe tani”, e cila u realizua po në hapësirat e “The Apartament”. Edhe në këtë rast aludimi vijon rreth konceptit të kohës, memories, historicizmit dhe mënyrës se si arti e reflekton paradoksin e kohës në të cilën ai kultivohet apo manipulohet.
“Kthim në të ardhmen” ka për qëllim të propozojë konceptin e ekspozitës në vetvete, e cila mund dhe duhet të përqendrohet kryesisht tek elementi i kohës dhe jo hapësirës. Konflikti për territor historikisht ka qenë një fenomen sa jetik aq edhe referencial,
argument të cilin mund ta idilizojë vetëm koncepti i kohës.
Ndoshta për faktin, sepse koha është i vetmi element të cilin ne nuk mund ta zotërojmë si një lojë fëmijësh. Sikurse sot mund ta përkufizojmë pa u trembur ekspozitën në vetvete, e cila e injoron
hapësirën duke u shndërruar në një maratonë intervistash apo si një tryezë e rrumbullakët. Kjo është ekspozita e cila eliminon elementin e hapësirës dhe e zëvendëson atë me një binom të ri: koha dhe publiku në të, ky burim njerëzor që është dhe qëllimi kryesor i çdo performance. Ekspozita përfshin punë nga autorë të huaj dhe vendas duke filluar nga antikiteti, rilindja, modernizmi, realizmi socialist,
post-industrializimi dhe post-kolonializmi do të qëndrojë e hapur për publikun deri më datë 20 mars.