Në Teatrin e Metropolit shfaqet të shtunën, më 9 - 16 mars, pjesa për fëmijë “Kopshti i çudirave”.
Shfaqja jepet në sallën “Çehov”, ora 10:30.
Nëse keni parë “Petritin dhe ujkun”, mos mungoni të ndiqni ngjarjet që zhvillohen në “Kopshtin e çudirave”. Është një përrallë për fëmijë dhe me fëmijë. Në fshat! Petriti me të motrën, shkojnë në shtëpinë e gjyshit, buzë pyllit për të kaluar pushimet e verës. Aty ndodhen dhe
gjelosh kokëboshi, qenush veshllapushi, maçok mustaqeshtiza,
miushja koketë dhe milingona punëtore. Aty ndodhet një kopsht i madh, ku fëmijët nisin të mbjellin zarzavate. Petriti së bashku me miqtë e tij çdo ditë punon në kopsht që zarzavatet të rriten sa më të bollshme. Kontrapuntin e jep muzika, për të cilën janë përdorur vija muzikore të ndryshme nga Sensans, Çajkovski, Prokofiev, Rossini, Pjacola, etj”. Shfaqja gjithashtu ka edhe një rrëfyes, i cili bën gjithë
shpjegimin e ngjarjeve. Libreti, regjia dhe koreografia e “Kopshtit të
çudirave” është punuar nga Llaqi Nako, skena dhe kostumet janë nga Holta Çika, interpreton grupi “Spektër”.