Më datë 12 mars, ora 19:00, Orkestra Simfonike e Radio Televizionit Shqiptar në bashkëpunim me Teatrin Kombëtar të Operës dhe Baletit (TKOB), në kuadrin e stinës koncertore të kësaj orkestre, do të jap një koncert muzikor në sallën e TKOB-it.
Repertori i këtij koncerti përbehet nga pjesë muzikore të kompozitorit shqiptar Aleksandër Peçi si "Skerzante" për orkestër harqesh, nga koncerti për piano e orkestër Op. 18, në do minor i
kompozitorit rus Sergei Rachmaninoff, me solist Herton Mikeli, dhe nga Simfonia No. 1 në sol minor “Ëndërr dimri” e kompozitorit tjetër
rus Pyotr Ilyich Tchaikovsky.
Orkestra e Radio Televizionit Shqiptar drejtohet nga dirigjenti Ermir Krantja, ndërsa drejtor artistik i shfaqjes është David Tukiçi.
Stina koncertore e Orkestrës Simfonike të RTSH-së u çel në fillim të këtij muaji me dy artistë nga Austria, dirigjentin Konstantin Iliesvsky dhe solistin Thomas Auner .
Sipas drejtorit artistik të këtij aktivitetit, David Tukiçi, stina koncertore e Orkestrës Simfonike të RTSH-se, do vazhdojë të sjellë bashkëpunime me artistë me përmasa botërore dhe shqiptar. Ndër të tjerë vlen të theksohet ardhja e dirigjentit Oliver Leo Schmidt nga Gjermania apo dirigjenti Stefano Rabaglia nga Italia, etj.