Në sallën e ekspozitave të përkohshme të Galerisë Kombëtare të
Arteve është hapur ekspozita e piktorit Genti Korini.
Kjo ekspozitë e titulluar "Struktura Kalimtare" është ekspozita e parë personale e artistit në GKA dhe përmbledh një cikël të fundit pikturash abstrakte. Piktura e Korinit është një akumulim qasjesh piktorike abstrakte. Ajo përmbledh brenda saj duke përzier në një trup të vetëm abstraksionizmin, abstraksionizmin gjeometrik, konstruktivizmin, suprematizmin dhe ekspresionizmin abstrakt. Të
gjitha këto qasje të ndryshme piktorike merren prej autorit si
referenca historike dhe sillen në funksion të prodhimit të një imazhi që tenton të gjejë ekuilibër mes kaosit dhe rendit. Piktura e Genti Korinit e risjell artin abstrakt në një kontekst analitik. Ajo vjen si një gjuhë artistike që mundëson dialog personal dhe njëkohësisht është e shtrirë në koordinata të gjera historike e gjeografike të cilat i mundësojnë asaj komunikimin e mesazhit të saj sa specifik aq
edhe universal.
Ekspozita do të qëndrojë e hapur deri në 23 Mars 2013.

Për më tepër informacion vizitoni:
www.gka.al