Thesari është premiera e re për fëmijë, e cila do të vijë në skenën e Teatrit të Metropolit të shtunën, më 23, 24 shkurt si dhe 2 dhe 3 mars, salla “Shekspir”, ora 10:30.
“Thesari”, një shfaqje sa edukative aq edhe argëtuese për grup moshën mbi tre vjeç. Premiera e re, e cila vjen në një stil ndryshe nga të tjerat, me muzikë live, me këngë, lojëra argëtuese, me
personazhe reale, është e përqendruar tek ambientalizmi dhe perspektiva. Ngjarjet e veprës zhvillohen në një pyll, në pranverë. Sikurse çdo bimë nis të çelë, edhe Aldena, kjo vajzë e vogël 12 vjeçare, niset për në pyll, në kërkim të trashëgimisë që i kish
lënë gjyshi, një thesar. Këtu ndodhin shumë situate komike dhe argëtuese, që ju bën të ditur në fund të gjithë personazheve të veprës se pylli është thesari i jetës. “Në shfaqje është përdorur një
frymë kontemporane, e sjellë për realitetin ku jetojmë, ku njerëzit
(aktorët) të personifikuar në kafshë, ndahen në dy grupe, të mirët dhe të këqinjtë. Shfaqja, ku interpretojnë aktorët; Klesta Shero, Brunilda Borova, Rudi Koçibelli etj, zgjat rreth 45 minuta dhe do të jetë në skenë pothuaj çdo fundjavë, e alternuar me shfaqjet e tjera për fëmijë që ka repertori i Teatrit të Metropolit.