Të dielën, më 24 shkurt, ora 19:00, violinisti shqiptar Zeqir Sulkuqi kthehet me formacionin e tij “Adriatika” për të dhënë një koncert me Ansamblin e Këngëve dhe Valleve në Teatrin e Operës në Tiranë.
Koncerti me titull “Nga viset e Arbrit tek miqtë e Ballkanit” shoqërohet nga orkestra e Ansamblit të Këngëve dhe Valleve
Popullore si dhe nga grupi i valleve dhe ai vokal i këtij ansambli.
Të ftuar në koncert janë edhe këngëtarët Kastriot Tusha e
Enkelejda Zepishta si dhe firzamoniçisti Sopot Serica. Koreograf
është Artan Ibërshimi.
Koncerti ka në program këngë e balet me koreografi të Artan
Ibërshimit, pedagog në Akademinë e Arteve, ku do të jetë një
suitë me valle ballkanike, si dhe dy kitarat me pjesë tradicionale
ruse.
Koncerti sjell në Shqipëri për herë të parë një muzikë të rrymës etno-ballkanike. Do të ketë muzikë nga trevat shqiptare, nga Hungaria, Serbia, Rumania, si dhe repertori cigan i gjithë Europës Qendrore dhe Ballkanit.
“Adriatika” , një formacion etno-jazz, ka një repertor të larmishëm që vjen pas një turi koncertesh që ka dhënë në shumë shtete si në Greqi, në Spanjë, Rumani, Serbi, Bullgari, Amerikë, etj.
Zeqir Sulkuqi ka studiuar për violinë, ka punuar si mësues në Shkollën Artistike “Onufri”, si pedagog i disiplinave muzikore në Institutin e Lartë Pedagogjik “Aleksandër Xhuvani” në Elbasan. Kur në këtë qytet u themelua ansambli “Isuf Myzyri”, ai ishte drejtuesi i parë i orkestrës. Ndërkohë bëri një jetë të dendur artistike me
Orkestrën e Harqeve, Orkestrën Simfonike, Muzikë Dhome etj.