Në Teatrin e Metropolit këtë fundjavë, në datat 12 dhe 13 janar, vjen premiera e re për fëmijë “Kopshti i çudirave”.
Shfaqja jepet në sallën “Çehov” në orën 10:30.
Nëse keni parë “Petritin dhe ujkun”, mos mungoni të ndiqni ngjarjet që zhvillohen në “Kopshtin e çudirave”. Është një përrallë për fëmijë dhe me fëmijë. Në fshat! Petriti me të motrën, shkojnë në shtëpinë e gjyshit, buzë pyllit për të kaluar pushimet e verës.
Aty ndodhen dhe gjelosh kokëboshi, qenush veshllapushi, maçok
mustaqeshtiza, miushja koketë dhe milingona punëtore. Aty ndodhet një kopësht i madh, ku fëmijët nisin të mbjellin zarzavate. Petriti së bashku me miqtë e tij çdo ditë punon në kopësht që zarzavet të rriten sa më të bollshme. Kontrapuntin e jep muzika, për të cilën janë përdorur vija muzikore të ndryshme nga Sensans, Çajkovski, Prokofiev, Rossini, Pjacola, etj”. Shfaqja gjithashtu ka edhe një rrëfyes, i cili bën gjithë shpjegimin e ngjarjeve. Libreti, regjia dhe
koreografia e “Kopshtit të çudirave” është punuar nga Llaqi Nako, skena- kostumet nga Holta Çika, interpreton grupi “Spektër”.
Shfaqja zgjat rreth 45 minuta.