Nga data 17 dhjetor deri më 6 janar, në galerinë "Miza" në Tiranë,
do të qëndrojë e hapur ekspozita “Hot Tabu” e artistëve Anila
Shapalaku, Agron Mesi, Olson Lamaj, Heldi Pema dhe Toni Milaqi.
Qëllimi i artistëve të kësaj ekspozite është që me veprat e tyre të shkundin dhe thyejnë tabutë e shoqërisë duke kapërcyer nga nudoja artistike tek ajo erotike, madje duke shkuar edhe më larg: tek nudoja seksuale. Kjo është një ndërmarrje ende fort e vështirë në
Shqipërinë e sotme postkomuniste ku, gjithsesi, erotizmi dhe pornografia bëjnë kërdinë në Internet duke sulmuar agresivisht fëmijë e adoleshentë, ndër të tjerë.
Por është e vështirë edhe për një arsye tjetër: prej dekadash, madje
shekujsh, seksi ka qenë një tabu e paprekshme në vendin tonë, prandaj letërsia dhe arti erotiko-seksual ende nuk pranohen me lehtësi nga publiku i gjerë madje as nga disa mjedise artistike. Ndaj një ekspozitë e tillë është e veçantë sepse pavarësisht se censura
ka rënë, mbetet autocensura, mbetet hija e tabuve të vjetra.
Ekspozita nuk është e përshtatshme për persona nën18 vjeç.
Galeria "Miza" ndodhet:
Rr “Vaso Pasha”, pallati 27,
( afer fakultetit te Drejtesise ), Tiranë.