Në ambientet e Galerisë FAP, pranë Universitetit të Arteve në Tiranë,
është hapur ekspozita personale e fotografit kosovar Fahredin Spahija. E titulluar “(Un)censored” ekspozita do të qëndrojë e hapur deri më datë 22 dhjetor.
Kjo është ekspozita e dytë e këtij fotografi nga Kosova në Tiranë.
Të parën e ka hapur para 9 vitesh.
“(Un)censored” përveç një komunikimi vizual me publikun, konsiderohet edhe si një thirrje për çlirim nga paragjykimet shqiptare karshi trajtimit artistik të trupit lakuriq apo nudos.
Titulli i ekspozitës shpreh gjithë dilemën e trajtimit të kësaj teme
shumë komplekse qysh nga Marubi e deri te ditët tona.
Spahija, deri një vit më parë drejtor i Galerisë Kombëtare të Arteve në Kosovë, ka ekspozuar për herë të parë në Tiranë në vitin 2003. Atëkohë, ai pati deklaruar se sfida e tij e radhës do të ishte fotografia nudo. Këtë paraqitje të dytë e konsideron si një rinjohje me publikun e Tiranës, dhe përmbushjen e këtij premtimi që
kishte dhënë më parë.