Qyteti i lashtë i Elbasanit po punon për tu bërë sa më atraktiv
për turistët e huaj dhe vendas.
Në ketë kuadër po kryhen një sërë punimesh në disa objekte të
lashta të qytetit siç është bazilika paleokristiane, e cila do të hapet
për turistët para festës së pavarësisë së vendit. Gjatë punimeve për zbulimin e plotë të kësaj bazilike janë gjetur qeramika dhe dëshmi të tjera të periudhës së ndërtimit të saj.
Në përfundim janë dhe rregullimet në segmentet e rrugës antike Egnatia, e cila kalon në mes të lagjes Kala. Në proces rikonstruksioni është edhe kulla lindore e Kalasë e njohur si Kulla e Zindanit.
Të gjitha këto projekte do të bëjnë më tërheqëse qendrën historike të Elbasanit, të cilën sipas burimeve të ndryshme këtë vit e kanë vizituar 8 herë më shumë turistë se vitin e kaluar.