Në kuadrin e “Tetorit Gjerman”, që organizohet çdo vit nga Ambasada e Republikës Federale të Gjermanisë në Tiranë, në ambientet e Tirana East Gate (TEG), në datën 27 shtator, hapet
ekspozita me titull” Botët e përrallave”.
Kjo ekspozitë përrallash për fëmijë dhe adoleshentë, vjen në Shqipëri me iniciativën e Institutit Goethe në Tiranë, dhe është e ndërtuar mbi motivet e përrallave me famë botërore të vëllezërve Grim. Ekspozita të shoqëron në shtatë stacione me motivet më të rëndësishme të përrallave gjermane dhe përmban shumë elementë për të dëgjuar, parë dhe imituar: Bëhet fjalë për magji, për kafshë ose dhe për heroinën e përrallës.
Ekspozita do të qëndrojë e hapur deri në datën 12 tetor.
“Tetori gjerman” siç quhen ndryshe javët e kulturës gjermane në Shqipëri, organizohet këtë vit nën leitmotivin„ 25 vjet art i krijimit“
duke prekur aspekte të 25 vjetorit të vendosjes së marrëdhënieve
gjermano-shqiptare dhe arkitekturës, si formë e artit, e cila rrethon pareshtur njeriun modern, dhe ndikon në jetën e përditshme dhe psikikën e tij të paktën në të njëjtën masë sikurse edhe muzika, letërsia dhe piktura. Veprimtaritë e këtij aktiviteti kulturor shtrihen gjatë gjithë muajit tetor deri në 18 nëntor.
Programi i “Tetorit gjerman” përmban sivjet një sërë projektesh dhe aktivitetesh në fushën e muzikës, artit figurativ, filmit, shkencës dhe letërsisë në Tiranë dhe në disa qytete të tjera të Shqipërisë.

Për me tepër informacion vizitoni
www.tirana.diplo.de/Vertretung/tirana/sq/Deutscher__Oktober__12/Deutscher__Oktober2.html