Më 12 nëntor, ora 19:00, në sallën Shekspir të Teatrit të Metropolit shfaqet komedia "Karnavalet e Korçës" me autor Spiro Çomorës dhe regji të Elma Dorezit.
Interpretojnë: Devis Muka, Ina Gjonci, Marsela Lena, Klodian Hoxha, Lorenc Kaja, Jonida Cunga dhe Oriana Came.
Kostumografia: Edlira Qyshka dhe skenografia: Beqo Nanaj.
Komedia është e ndërtuar në tri akte.
Veprimi zhvillohet në Korçë dhe rrëfehen ngjarjet në mjedisin e këtij
qyteti, në vitin 1936. Skena kryesore ku ndodhin ngjarjet është e vendosur në shtëpinë e një tregtari të pasur, Nikollaq Jorganxhiut.
Dyshja Nikollaq dhe Olimbi, çifti i bashkëshortëve që përfaqësojnë
tregtarët e vegjël të Korçës është një dyshe sa komike, aq edhe tragjike. Ata kanë një synim të përbashkët: ta martojnë çupën
e tyre të vetme Afrovitin, por prapamendimet i kanë të ndryshme.
Në thelb ata janë dy prindër egoistë, të cilët jo vetëm që nuk e ndihmojnë vajzën e tyre, po e vendosin atë në situata qesharake e tragjikomike. Afroviti është pasqyra e prindërve të saj, por nëse ata
janë të rrahur nga jeta, ajo shfaqet me gjithë mendjelehtësinë, dashakeqësinë dhe antipatinë e një vajze të moshës së saj.
Kjo shfaqje jepet në kuadrin e Festivalit Mbarëkombëtar të Dramës Shqipe, i cili zhvillohet nga data 10 deri më 17 nëntor në Tiranë.