Në kuadër të 100-vjetorit të Pavarësisë, Orkestra Simfonike
e RTSH, feston 50-vjetorin e krijimit të saj me një koncert gala,
me pjesëmarrjen e kompozitorëve, dirigjentëve dhe interpretuesve më të njohur.
Koncerti gala do të luhet në sallën e Universitetit të Arteve, më datë 18 tetor në ora 19.00. Në këtë koncert do të interpretohen pjesët si
“Uverturë Festive” nga Nikolla Zoraqi, suitë nga baleti “Delina” nga Çesk Zadeja, romancë për piano dhe orkestër nga Tonin Harapi, uverturë nga filmi “Liri a vdekje” shkruar nga Kujtim Laro, pjesë nga
“Bashkimi i Shqypnisë” shkruar nga Palok Kurti, pjesë nga opera
“Skënderbeu” shkruar nga Prenk Jakova, suitë nga baleti “Gjergj
Elez Alia” shkruar nga Feim Ibrahimi, etj. Të gjitha këto pjesë
do të drejtohen nga dirigjentët si Jetmir Barbullushi, Eno Koço,
Zhani Ciko. Po këtë ditë, ora 10:00, do të organizohet edhe një mbledhje jubilare në sallën “Ferdinand Deda” në Radio Tirana. Orkestra Simfonike e RTSH-së u themelua më 16 maj të vitit 1962 si
formacioni orkestral më i madh i kohës. Orkestrantët ishin kryesisht
muzikantë të rinj, që studiuan në vend, si dhe nga profesionistë të specializuar në Pragë, Moskë, Laipcig etj.
Fillimisht u quajt “Orkestra Simfonike e Radios dhe Kinematografisë” dhe krijimi i saj shënoi një etapë të re në zhvillimin kulturor dhe artistik në Shqipëri. Koncerti i parë u realizua më 20 gusht të po atij viti nën dirigjimin e Mustafa Krantjes dhe u luajtën vepra të Haydn, Mendelssohn dhe Mozart. U ekzekutuan dhe u regjistruan veprat
e kompozitorëve shqiptarë Zadeja, Harapi, Daija, Grimci, Çangu, Lara, etj, për të vijuar me brezat më të rinj si Gaqi, Dizdari, Kushta, Lara, Peçi, Shupo, etj.