Ansambli i Operës së Dhomës Dresden, Gjermani, shfaq në datën 14
tetor, ora 18:00, në Teatrin e Kukullave në Tiranë, operën "Hansel dhe Gretel" të bazuar në përrallen me të njëjtin emër të vëllezërve të famshëm Grimm.
Gjatë një ore të këndshme dhe plot surpriza spektatorët e vegjël do të përjetojnë se si dy fëmijët, Hansel dhe Gretel, arrijnë t‘ia punojnë magjistares së ligë. Historia e operës për fëmijë dhe të rritur sipas përrallës romantike të Engelbert Humperdinck dhe e përpunuar
nga Thomas Ender bazohet në versionin origjinal të 1890.
Përrallën e vëllezërve Grimm e njohin të gjithë: Shumë kohë më parë, në një pyll të errët ndodhej një shtëpizë e rrënuar nga ku vinte një dritë e dobët. Në këtë shtëpizë jetonte familja e shportë-bërësit të varfër Peter Fshesalidhësit. Hansel dhe Gretel, dy fëmijët e kësaj familje, ishin gjithmonë të gatshëm për gjithfarë rrengjesh dhe
lojërash. Së bashku ata kishin kaluar aventura nga më të mëdhatë Por një ditë, kur ata humbën rrugën në pyllin e magjepsur duke kërkuar kërpudha dhe manaferra, një aventurë akoma më e
madhe po i priste: magjistarja fëmijëkullufitëse Rosina Grykësja, e
cila arriti të kapë dy fëmijët...
Kjo shfaqje dhe dy të tjera në Buçimas / Pogradec zhvillohen në kuadrin e Tetorit Gjerman në Shqipëri dhe janë pjesë e një turneu të madh të Ansamblit të Operës së Dhomës Dresden në Evropën Juglindore.