Edicioni i tretë i festivalit “Bunker Fest” do të mbahet në datat 8-9 shtator në Pezë, rreth 30 minuta larg qytetit të Tiranës.
Për të marrë pjesë në këtë festival muzikor janë ftuar edhe grupe dhe DJ nga rajoni, të cilët për dy ditë do të performojnë 'non stop' muzikë.
Disa nga grupet që do të marrin pjesë janë grupi i njohur kosovar i muzikës rock “Jericho” dhe ai nga Maqedonia “Blla Blla Blla”.
Artistët e tjerë që tashmë kanë rezervuar datat për këtë festival
janë edhe “Peppa Marriti”, “Ansambli i Tiranës”, “Inspektre”,
“Undo and Redo”, “Alien No. 155”, “Sterile Hermaphrodite”, “Iron Van”, “Der Maiden”, “Indripendent FX”, “Roots Raids”, DJ Nino etj.
Ky festival po vazhdon të promovohet edhe në vende të ndryshme të botës si Spanje, Itali, Angli, Maqedoni, Mal të Zi dhe Kosovë. Zanafilla e këtij festivali ka nisur dy vjet më parë, kur një grup të rinjsh nga Tirana, së bashku me një grup holandezësh, nisën punën për të xhiruar një dokumentar për bunkerët në Shqipëri.
"Kërpudhat e betonit" – kjo ishte logoja që i vendosën bunkerëve, të cilët duhej të shndërroheshin në prova të gjalla të një pjese të errët të historisë së Shqipërisë duke i përdorur për qëllime të tjera.
Dokumentari me holandezët përveç evidentimit të numrit të madh madh të bunkerëve në Shqipëri, kishte për qëllim edhe promovimin e idesë së valorizimit të tyre duke i përdorur për funksione të reja. Disa bunkerë, të cilët gjatë kohës së komunizmit në Shqipëri kishin mbushur plot e përplot vendin, tashmë janë shndërruar në bare, në "tattoo shop" etj. Ideja e këtij festivali është pikërisht promovimi i
kësaj iniciative.