Në sallën e ekspozitave të përkohshme të Galerisë Kombëtare të
Arteve në Tiranë është hapur edicioni i 19-të i ekspozitës së përvitshme ‘Onufri’.
Ky edicion kurohet nga kuratori italian Daniele Capra dhe mban titullin “Ndoshta të ëndërrosh”. Titulli vjen nga monologu i famshëm i Hamletit të Shekspirit. Capra ka zgjedhur këtë titull sepse sipas tij ka një ngjashmëri të madhe mes Hamletit të turbulluar e të gjendur në situatë të vështirë personale, por që pavarësisht kësaj, mundet të filozofojë mbi botën dhe enigmat e saj. Sipas Capra-s artistët shqiptarët sfidojnë realitetin aspak të lehtë për ta dhe arrijnë të propozojnë zgjidhje personale. Por nëse Hamleti zgjodhi rrugën
e hakmarrjes për zgjidhjen e problemeve të tij, artistët në këtë ekspozitë shtrojnë dhe kërkojnë zgjidhje të tjera.
Në ekspozitë kanë paraqitur punimet e tyre artistë të tillë si:
Lucian Bedeni, Yllka Gjollesha, Genti Korini, Mariana Kostandini,
Remijon Pronja, Alketa Ramaj, Vjolana Murataj, Arjan Shehaj.
Ekspozita do të qëndrojë e hapur deri më datë 3 shkurt 2013.
Galeria është e hapur nga e marta në të diel
nga ora 10:00 - 18:00.
|