Gërmimet arkeologjike në rrugën "Aleksandër Goga”, në qytetin e
Durrësit, krahas varreve antike kanë nxjerrë në dritë edhe sende e objekte të tjera antike. Tashmë ka shkuar në 92 numri i varreve të periudhës helenistike. Varret helenistike datojnë nga periudha e shekullit të II para erës sonë e deri në atë të antikitetit tonë, të shekullit të VI. Tashmë është bërë i mundur identifikimi i gjithë sipërfaqes së sheshit, i cili pritet të pasohet me zhvendosjen e eshtrave dhe objekteve të tjera me vlerë historike e arkeologjike, për të vijuar më pas pastrimin dhe dokumentimin e tyre.
Në këto gërmime arkeologjike krahas varreve antike, të klasifikuara si mjaft të rëndësishme për arkeologët janë edhe disa sende të tjera të gjetura si objektet prej qeramike, qelqi, metalike, monedha bronzi lehtësisht të datueshme, të cilat pritet ti nënshtrohen studimit. Zbulimi është bërë në zonën arkeologjike B të qytetit, rreth 2 km larg qendrës, në Lagjen nr 8. Ky fond i pasur arkeologjik, është menduar ti kalojë muzeut arkeologjik të Durrësit.